Allen den(en), die disen brief ansehent oder hoerent lesen, tuon wir, Diethelm von Gottes gnaden apt des closters in der Rychen owe und die herren gemainlich des selben closters sant Benedictus ordens, kunt und versehen offentlich, das wir Adelhaiten, Cuonrats des Mads tohter uß dem Düerren holtz, Bernhart des Bruggs von Brigen elichen witwen, unser Gotzchuses aigen wip, haben gegeben recht und redelich und geben mit disen brief den Erwürdigen und Gaistelichen, unser Genadigen herren apt Hainrichen von Gottes gnaden und den herren gemainlich des closters ze sant Georien des selben ordens, ze ainen rechten wehcel umb Luggarten des Wydenerien tohter von Tuonoweschingen, Hugen des Zwenings elichen witwen, irest Gotzhus aigenen wip. Mit solichem gedinge und also das, das vorgeschen Gotzhus ze sant Georien die vorg[enant] Adelhaiten und alle ir nachkomen iedine haben und niessen, sol besetzen und oitsetzen als ander ir aigenen lute ane aller slaht generde. Und ton wir noch kain unser nachkomenen kain ansprache nimer haben noch gewinen an die vorgen[ant] Adelheiten noch an ir nachkomen weder sus noch so. Und dar umb ze ainem offen Urkunde so han ich, der vorgenant apt Diethelm min insigel gehenket an disen brief, der geben ist ze Vilingen an sant Moricis tag, do man zalt von Gottes geburt Druzehenhundert Dreissig und Sieben Jar.